Туруйа уруйдуур хаһыытын

Туруйа уруйдуур хаһыытын
Истээтин мин биллим эйигин,
Кыыдааннаах кыһыны сыҕайан,
Өлүөнэм биэрэгэр кэлбиккин,

Сааскы кэм барахсан!

Үрүҥ күн мичээрин күүһүнэн
Үллүктүүр хаардары сууһарыый,
Үлүскэн сүүрүккүн көлүйэн,
Үрэҕим муустарын уһаарыый,

Сааскы кэм барахсан!

Хотоолго хомускун тыаһатан,
Үрүччэ буолаҥҥын үрүлүй;
Халдьыаҕа харалык муҥунан
Ньургуһун бэртэрин үүннэриий,

Сааскы кэм барахсан!

Алааска атыыргын баргыытат,
Оҕускун айаатат фермаҕа.
Кытаатан кыымна ук, кытаатан,
Кыыс оҕоҥ уйаҕас сүрэҕэр,

Сааскы кэм барахсан!

Оччоҕо мин дууһам уһуктуо,
Омуннаах хаан оонньуо уолукпар;
Оччоҕо мин ырыам тобуллуо,
Хаан кэйиэ, күүс киириэ ырыабар,

Сааскы кэм барахсан!