Selâm, saña, Qara deñiz

Selâm saña, Qara deñiz,
Yıllar keçip körüştik.
Menim alım fena degil,
Tek başıma çal tüşti.

Ya, sen deñiz, neler kördiñ,
Neçün közüñ yaşlana?
Ağlama sen, buzlar köçti,
Yañı ömür başlana.

Selâm saña, Qara deñiz,
Ayt sen maña alıñnı.
Öpem seniñ yañğız qalğan
Taşlarıñnı, yalıñnı.

Tek bir şeyni yahşı bilem,
Sensiñ menim taqatım.
Sennen ağlap, sennen külem,
Sensiñ menim ayatım.

Eger ölsem, seniñ yalıñ
Olsun menim mezarım.
“Selâm saña, Qara deñiz”,
Kelip aytır ballarım.

Bugün saña dua etem,
Üzülmesin nesilim.
Menim ömrüm, menim Allam
Sensiñ, Qara deñizim.

Seni oylap, asret çekip,
Qaç kereler men öldim.
Saña deñiz qaytmaq içün
Qaç kereler, tirildim.

Bugün saña dua etem,
Üzülmesin nesilim.
Menim ömrüm, menim Allam
Sensiñ, Qara deñizim.