Кашыңның каралары

Кашыңның каралары ла,
 Карлыган каралары.
 Без үзебез аерылмадык,
 Без үзебез аерылмадык —
Язмышлар аралады.

Күзләреңне, күзләреңне,
 Күзләреңне күзләдем.
 Күзләреңнән серең алдым,
 Күзләреңнән серен алдым —
 Син бит шуны сизмәдең?!

Утырып пар атларга ла,
 Киттең кай тарафларга?
 Сагышларымнан нишләрмен,
 Сагышларымнан нишләрмен —
 Килми сәлам- хатлар да.

Башымны салдым салларга,
 Чайкалдым елгаларга.
 Аерылгач җиңел түгел,
 Аерылгач җиңел түгел
 Яшәргә дөньяларда.