Сиртэн сүппүт киhи ырыата

Эрчимнээх күүстэрбин элэтэн эрэҕин,
Эгэлҕэ тылларбын этитэн эрэ5ин...

Ол ыраах арыыга үрүҥ күн тыгар,
Миигин өйтөн сиэтэн илдьэ бара сыhар.
Туман нөҥүө ый буолан көстүө,
Сүрэҕим сүмэтигэр өйдөбүлэ сөҥүө.
Батыhыма миигин хаампыт ыырбынан -
Үтүө уонна хобдох икки ардынан.
Хара санаа хараардар үрүҥү даҕаны,
Атын этэ манна өбүгэлэрбит саҕана.
Тугун сүрэй? Сыалым ситэ илик!
Оттон, мин санаабар, бу ырыа бүтэhик.
Аны туох да миигин бу сиргэ күүппэт,
Барыта албын, сымыйа уонна бүппүт!
Кырдьык суох. Эн өссө утараҕын дуо?
Ханна көрдүн этэй үрүҥ күнү? Суох!
Төhө да ытаа, кээмэйгин ааспаккын;
Тапталы, дьолу кыайан атыыласпаккын.
Өйдөө, хайа өрүс хайа биэрэгэр
Көстөрүй эн олоҕун биэтэгэ?
Истибэккин этэр тылбын эдэрим иhин.
Баҕар көрдүн буолуо миигин бүтэhигин
Бүгүн. Ким да улахаҥҥа уурбат,
Оттон миэхэ син биир олох турбат
Биир сиргэ. Кырдьык көстүөн өссө эрдэ.
Чачаас өйдөөх бэйэтин мутугун кэрдэр.
Бу сиргэ салгын эрэ кырдьыбат,
Хомойуох иhин ити олохпут кырдьыга.
Онтон мин сүрэҕим - муус,
Ой дуораана буолан иhиллэр хомус.
Хотугу Сулус имэҥниир миэхэ,
Ийэ кутум тиийиэ хаhан эмэ киниэхэ.
Мин бүгүн көрдүм
Төрөөбүт дойдум күөх дуолун, үрдүн.
Ол көстүүттэн этим тардан ылла,
Сүтүөм, ол эрэн хостоoн тыллыам
Кэнники кэмнэрбэр...
Оо, арай дьолу буллум диэтэрбин
Ыллыам этэ мин уостубат дьол ырыатын,
Ол кэннэ сүтүөм этэ күһүнү кытары.

Умайар дьаралык уотугар
Эн толук буолаары тураҕын.
Ол курдук, туох эрэ быатыгар
Бу эттээх тойугу туойаҕын...

Мин тулалыыр эйгэм - дьон-сэргэ күлүк көстүүтэ,
Cыалым-соругум ситэ илигэ, сүрэҕим оргууй тэбиитэ.
Арахсыспат мин аргыhым - дьон хараҕар көстүбэт күлүк...
Эhиэхэ тиийдин мин дууhам кыланыыта!
Ыраахха диэри иhилин, сиртэн сүппүт киhи ырыатa!...