Гапалау

Муз. и сл. народные.

Ёксюз болуб ёсген эдинг, Гапалау,
Кёб къыйынлыкъ кёрген эдинг, Гапалау,
Къарыусузгъа нёгер эдинг, Гапалау,
Анасындан джигит туугъан Гапалау!

Инджилгеннге сен таянчакъ болуученг,
Ала ючюн сёзню таукел салыученг,
Керек болса, алларында барыученг,
Анасындан джигит туугъан Гапалау!

Джарлылагъа билек болуб кюрешдинг,
Алагъа джер юлюш алама дединг.
Ала ючюн алгъа салдынг джанынгы,
Анасындан джигит туугъан Гапалау!

Кесинг джангыз таукел блолуб, учунуб,
Джер юлешген джерге чыгъыб кетгененг,
Онгсузланы унутмагъыз, дегененг,
Анасындан джигит туугъан Гапалау!

Ыстауатда толу къазан къайнайды,
Хыршыларынг, душманларынг къоймалла,
Сени юсюнгде тогъуз къазыкъ ойнайды,
Анасындан джигит туугъан Гапалау!

Артха турмай, сен тюзлюкге ийнаныб,
Сермешесе къызыл къаннга боялыб,
Джан джанынгдан джаула арагъа алалла,
Анасына джигит туугъан Гапалау!

Онг алдыла бир джакъ адам джетгинчи,
Джыгъылмадынг тогъуз къама тийгинчи,
Джан бермедингнг тогъуз къама киргинчи,
Анасындан джигит туугъан Гапалау!

Атанг джокъду кёзлеринги джумаргъа,
Ананг джокъду къан башынгы джууаргъа,
Ким табылыр хапарынгы айтыргъа,
Анасындан джигит туугъан Гапалау?

Гапалауну ёлтюрдюле, сойдула.
Джаш къатынын ау тюбюнде къойдула.
Джарлы ёксюз, бары сенге джылайла,
Анасындан джигит туугъан Гапалау!