Патимат

Музыка и стихи Исмаила Семенова (Джырчы Сымайыла) (1891-1981).

Ой, Хырхалада да субай Патимат,
Олтура бардыкъ къараша.
Бизни аллыбызгъа алай чыкъгъаненг,
Кийген кийиминг джараша.

Ой, чериуанча да чилле джаулугъунг
Чачагъы токъмакъ тюйюлюб,
Келишалмасакъ абзырарчама
Насыб дегенден тюнгюлюб.

Ой, чериуанча да чилле джаулугъунг,
Табанларынгдан къаз ёте,
Джукъ сездирмейин а нек тынгылайса
Умутларымы аз эте?

Къанджалбаш юйле да ишлетдим, алан,
Терезе къабла салдырыб.
Излейме дей да, керексе дей да,
Таб къойдум къылыкъ алдырыб.

Келечи Наныкъ а иш баджармайды,
Тюз кесим салыб бармасам.
Бу халкъ не айтыр, ийнар, джыр этиб, 
Патимат, сени алмасам?
 
Хар кёргенине бир ийнар (джыр) этеди деб, 
Гурушханг манга джетгенди. 
Ийнан, сюймеген иш этиб санга 
Мени сёзюмю этгенди.

Ой, чериуанча уа чилле джаулугъунг
Эки къанаты чох болуб,
Узакъ ёмюрню да алай джашарбыз
Бир-бирибиз бла шох болуб.

Мен Семенланы сары Сымайыл,
Сен Ёзденланы (Хырхаланы) Патима...
Хей, къысхаакъыллыкъ этесе дейме
Келечи къоймай къатынга.

Къалаханлада уа минг кёзлю оймакъ,
Аны Хырхалары туталла.
Ийнеден ийнек этген къоллары
Деб манга хапар айталла.

Ой, окъа тигиучю саяу къолларынг
Къурч ийнелени чий этер.
Бу мени кибик а бошбоюнланы (къургъакъсёзню)
Кечеден кюннге юй этер.

Бир-бирибизге уа джарашырыкъбыз
Схарлагъа тыйын салгъанлай.
Бошбоюнлугъум а алай да кетер,
Патимат, сени алгъанлай.

Ой, имбашымда уа чыммакъ акъ башлыкъ,
Анга акъ джалыу тигерсе.
Мен - къызгъан темир, сен - чемер уста,
Къайры сюйсенг да бюгерсе.