Уататы Бибойы зарæг

Слова: Кокайты Т, музыка: Тедеты Ш.

Ды хордтай Иры зæххæй ард,
Сыгъдис йæ сæрвæлтау дæ цард.
Йæ цинтæн кодтай ды лæггад,
Йæ кадмæ хастай кад.

Ды хастай Иры зынты уаргъ,
Ды кодтай Иры цинтæн аргъ.
Уыдтæ нæ зæрдæты паддзах.
Дæу уарзтам бирæ мах.

О, Хуыцау, — дæ уд уæлæрвтæм ныр фæтахт.
Ды уагътай нын дæ хъыгты уаргъ, —
Уæддæр дæ уарзæм мах.

Уыдтæ ды фарны цинæй дзаг.
Уыдтам дæ рæсугъд уды уаг,
Уыдтам дæ раст хъуыдыты таг,
Уыдтам дæ рухс фæндаг.

Ды хастай Иры зынты уаргъ,
Ды кодтай Иры цинтæн аргъ.
Уыдтæ нæ уарзты рухс паддзах.
Дæу бирæ уарзтам мах.

О, Хуыцау, — дæ фарн уыд Иры зæххыл баст.
Ныр Ирæн баззади дæ уарзт.
Æгас æрцу, æгас!

Ды самадтай бæрзонд мæсыг,
Уым бавæрдтай дæ цин, дæ зын.
Уым бандзаг ис дæ рухс цæссыг
Æмæ нæ Иры хъыг.

Ды хастай Иры зынты уаргъ,
Ды кодтай Иры цинтæн аргъ.
Уыдтæ нæ уарзты рухс паддзах.
Дæу бирæ уарзтам мах.

О, Хуыцау, — дæ фарн уыд Иры зæххыл баст.
Ныр Ирæн баззади дæ уарзт.
Æгас æрцу, æгас!