Сандугач керде кунелгэ

Мәхәббәт мәхәббәт инде,
Кайларга куйыйм аны?
Авырмени сагынганда
Өзелеп сөйгән ярны?

Талларга кунды сандугач —
Мин аны эзлиммени?
Сандугач керде күңелгә —
Җырламый түзиммени?!

Синең күлмәгең алсу дип,
Кызарып торыйммыни?
Яратам диеп әйтергә
Рөхсәтләр сорыйммыни?

Талларга качты сандугач —
Мин аны эзлиммени?
Сандугач керде күңелгә —
Җырламый түзиммени?!

Сандугачларны ишетми
Йөримме карурманда?
Тамчылар күрмиммени соң
Шаулап яңгыр яуганда?

Талларга качты сандугач —
Мин аны эзлиммени?
Сандугач керде күңелгә —
Җырламый түзиммени?!