По грехом нашим

По грехом нашим на нашу страну
Попустил Господь такову беду. 
Облак темный всюду осени.
Небо и воздух мраком потемни. 
Солнце в небеси скры своя лучи
И луна в ноши светлость помрачи 
Но звезды вся потемниша зрак,
И дневный свет приложися в мрак.

Тогда твари вся ужаснушася,
Но и бездны вся содрогнушася.
Егда адский зверь сия разреши
От заклеп твердых нагло изскочи. 
О, коль яростно, испусти свой яд
В кафолический красный вертоград.

Зело злобно враг тогда возреве,
Кафоликов род мучить повеле.
Святых пастырей вскоре истреби,
Увы жалости, огнем попали,
Честных иноков уловляхуся
Злым казнением умерщвляхуся, 
Всюду вернии закаляеми,
Аки класове, пожинаеми.

Тогда вернии горце плакаху,
Зело жалостно к Богу взываху.
Время лютости, Боже сократи,
От мучительства злаго защити.
Аще не твоя помощь сохранит,
И избранных всех, адский змий прельстит.
Ох, увы, увы, лютых тех времен,
Ох, увы, увы, скорбных оных дней.

Како лютый зверь сад наш погуби,
Вся древесия вскоре попали.
Аще вспомянем благочестие
И пресветлое правоверие,
Егда процветал крин церковный,
Зело облистал чин священный. 
То не можем быть без рыдания,
Без скорбного воздыхания.
Ох, увы, увы, благочестие,
Увы, древнее правоверие!

Кто лучи твоя вскоре потемни,
Кто блистания, тако измени,
Десяторожныи зверь сего погуби,
Семиглавый змий тако учини. 
Весь церковный чин зверски преврати,
Вся предания злобно истреби.
Церкви Божия осквернишася 
Тайнодействия вси лишишася.
Но пастыри попленилися,
Жалом новшества умертвилися.
Зело горестно о сем плачемся,
Увы, бедны, вси сокрушаемся. 
Что вси пастыри посрамилися,
В еретичестве потопилися.

Оле бедствия нам без пастырей! 
Оле лютости без учителей!
По своей воле вси шатаемся,
От зверей лютых уязвляемся. 
Всюду беднии утесняемся,
От Отечества изгоняемся.
За грехи наши днесь родилися, 
В таковы беды попустилися.

Почто в юности мы не умрохом,
В самой младости не успохом.
Избежали бы мы сих плачевных дней,
Не видали бы мы лютых сих времен. 
И мы горце вси выну плачемся,
Преболезненно сокрушаемся.
Вавилонская любодеица
И сквернавая чародеица.

Представляет всем чашу мерзости
Под прикрытием малой сладости. 
И мы слабые тем прельщаемся,
Сластолюбием уловляемся.
Увядает днесь благочестие,
Процветает же все нечестие. 
Лжеучители почитаются.

На кафедрах вси возвышаются.
Верных собори истребляются
Сонми мерзости умножаются. 
Вся пророчества совершаются
Предсказания скончаваются.
И чего еще хощем ожидать
Посред мира долго пребывать 
Уже жизнь сия скончевается
И день судный приближается.
Ужаснись, душе, суда страшного
И пришествия все ужасного.

Окрылись, душе, крылы твердости
Растерзай, душе, мрежу прелести. 
Ты пари, душе, в чащи темныя,
От мирских сует отдаленныя,
Постигай тамо верных мал собор
Укрывающихся посреди холмов.
Не страшись, душе, страха тленнаго,
Но убойся ты, огня вечного.

Изливай, душе, реки слезныя,
Простирай к Богу мольбы многия. 
Крепко на него всегда уповай,
Во веки веком его прославляй.