Ийнарла (Алгъыш)

Муз. и сл. народные.

Сен ийнар айт деб, къысмагъыз, тенгле, 
Къалай этейим да, не айтайым?
Джашлагъа – алгъыш, къызлагъа – къаргъыш, 
Бир-эки ийнар айтайым.

Мени къыйналыб айтхан сёзлерим
Ауур тиймесин кёлюнге.
Чубар джыланча, алай кёрюннгюн, 
Сен салыб баргъан юйюнге.

Ой, сени алгъаннга, алтын саугъаса, 
Башчыса джюрек къаугъагъа. 
Уллу кёллюсе, бир бек ушайса 
Кавказда мийик таулагъа.

Ой, сюймеклигинг ичинге тюшюб, 
Сен сюймекликден алыннгын.
Бойнумдан тутуб, къаты къучакълаб, 
«Меннге оноу эт», – деб джалынгын.

Ой, башыбызда кёк къанатлычыкъ
Салкъын сыртлагъа барады.
Тюрсюнчюгюнг ариу болгъанлыкъгъа, 
Халичигинг джюрек джарады.

Ариу, дейдиле, эрши, дейдиле , 
Ариу эршиге не беред?
Ариу болгъанлыкъгъа,  акъыл болмаса, 
Ариулугъундан не келед?

Бюгече кече бир ариу кечеди –
Къоянла отлаб тоялла.
Накъырда этсенг ариу къызлагъа,
Тилеген атха къоялла.

Сени юсюнгде къара тончугъунг, 
Акъ болур, дейме, джагъасы. 
Ийнарларымы сатхан этеме,
Бир тюз боллукъду багъасы.