На реках Вавилонских (Крупицкий)

На реках Вавилонских, тамо седохом и плакахом, 
внегда помянути нам Сиона. Алилуя.
На вербиих посреде его обесихом органы нашя. Алилуя.
Яко тамо вопросиша ны пленшии нас о словесех песней и ведшии нас о пении: воспойте нам от песней Сионских. Алилуя.
Яко воспоем песнь Господню на земли чуждей? Алилуя.
Аще забуду тебе, Иерусалиме, забвена буди десница моя. Алилуя.
Прильпни язык мой гортани моему, аще не помяну тебе, аще не предложу Иерусалима, яко в начале веселия моего. Алилуя.
Помяни, Господи, сыны Едомския, в день Иерусалимль глаголющыя: истощайте, истощайте до оснований его. Алилуя.
Дщи Вавилоня окаянная, блажен иже воздаст тебе воздаяние твое, еже воздала еси нам. Алилуя.
Блажен иже имет и разбиет младенцы Твоя о камень. Алилуя.