Compagno, non puesc mudar qu'eo no m'effrei

Compagno, non puesc mudar qu'eo no m'effrei
 De novellas qu'ai auzidas et que vei:
 Qu'una domna s'es clamada de sos gardadors a mei.
diz que non volo prendre dreit ni lei,
 Ans la teno esserrada quada trei:
 Tant l'us no-ill larga l'estaca que l'altre plus no la-ill plei.
Et aquill fan entre lor aital agrei:
 L'us es compains gens a foc mandacarrei,
 meno trop major nausa que la mainada del rei.
Et eu dic vos, gardador, e vos castei:
 e sera ben grans folia qui no-m crei:
 Greu verretz neguna garda que ad oras non sonei.
Qu'eu anc non vi nulla domn'ab tan gran fei,
 Qui non vol prendre son plait o sa mercei,
 S'om l'aloigna de proessa, que ab malvestatz non plaidei.
si-l tenez a cartat lo bon conrei,
 Adoba-s d'aquel que troba viron sei:
 Si non pot aver caval, ela compra palafrei.
Non i a negu de vos ia-m desautrei,
 S'om li vedava vi fort per malavei,
 Non begues enanz de l'aiga que-s laissez morir de sei.
Chascus beuri'ans de l'aiga que-s laises morir dessei