Адамлагъа алгъыш тилек

Бир сейирд бу ёмюр,
Бу джомакълы ёмюр!
Джашауну атламын
Къарау сокъур кёрюр.
Алай а джюрекден 
Джол къыйынд джюрекге,
Джер ушайд кюкюртге,
Джут адам -сернекге.
Джокъду джерде тынчлыкъ,
Адамла ашыгъыш
Къайры барадыла,
Болмагъанча таныш?!
Ашарыкъдан толу
Тепсини джанына
Олтургъан адамла
Чырт ач болмасынла!
Джерни сабийлери,
Дуния мал амалтын
Тас этмегиз Джерден
Адамлыкъны шартын!
Джерни уланлары,
Уллу кёллю болсакъ,
Джашауну чегинде 
Сюелмесек биз сакъ,
Къоркъуулуд бу ёмюр,
Ачылса къазауат,
Джер болур кюл-кёмюр,
Тас болур адам ат!
Дайымлы джашаргъа
Адамда амал бард!
Сакъла рахатлыкъны:
Гитче, уллу, эм къарт!