Воспомянух житие свое клироское (9)

IX

Воспомянух житие свое клирское
Азъ непотрбныи,
Печалное реку и скоропреселное,
Глаголя: Увы мнѣ!
Что сотворю,
Гдѣ убо живу,
И како терплю?
Въ монастырѣ убо игумени и икономи,
И келари и казначѣи,
Вкулѣ же и подъкеларники и чашники,
И соборныя старцы гордливыя,
Самолюбиемъ обьяшася,
И братоненавидѣниемъ соплетошася,
И скупотию связашася,
И лукавъствомъ помрачишася, окаяннии.
Сами дѣюще тмами неподобная,
Намъ же о единомъ маломъ нѣкоемъ малодушии
Зѣло зазирающе.
Сами убо безвременно вкушаху
Различная брашна,
Насъ же и худыми брашны
Не хотяту питати.
Вино же и всякое питие
Всегда пияху,
Сего ради презрѣна насъ,
Своея ради безумныя скупости,
Но весма обладающе,
Насъ же ни единаго кратира сподобляюще.
Оле безумныя скупости!
Оле небратолюбия!
Не свѣдуще убо,
Яко едина божия благость равна всѣмъ,
И каково иноческое обѣщание.
Но убо аще и вѣдуще,
Но лукавнующе во всемъ,
И своя чрева насыщающе,
И одежды разширяюще,
Красящеся и гордящеся
Богатъствомъ паче мирскихъ,
Странныхъ же и нужныхъ не милующе,
Но и оскорбляюще.
Но владыко царю небесныи,
Христе боже нашъ,
Подаждь намъ терпѣние
Противу ихъ оскорбления
И избави от насилия ихъ
И спаси ны, господи,
Яко человѣколюбецъ.