Заз яр ава, яргъарава(лезгинская народная старинная)

Заз яр ава, яргъарава,
Чи арада дагълар ава.
Яр авай пад гуьлуьшан я,
Чи патара маргъар ава.

Рагъ атайла циф элцифда,
Гъам атайла рикI къекъифда.
Зи хиялар гьа санихъ я,
Ярдин кьилив гьикI илифда.

Мад алукьна алахьай къар,
Жив дагъдивай къакъатна, яр.
Ви гелери цуьк акъудрай,
Зи рикI къеняй акъатна, яр.

Заз яр ава, яргъарава
Гьар йифиз зи ахварава.
Низ ахъайин за рикIин дерт,
Заз яр ава, яргъарава.