Тойлар олсун/Toylar olsun

TOYLAR OLSUN!
(Dilâra Mahmudova içün yazılğan yır)

Bu aqşam bizde bayram,
Evlene qız ve oğlan.
Yan-yana adım ata,
Olar bugun’ ayatta.
Kelin beyaz anterde,
İnciler bar fesinde.
Onıñ qısmeti endi
Kiyevniñ ellerinde.

Bağlama:
Yañı saife açıldı,
Eskileri taşlandı.
Endiden eki yaş içün
Yañı omür başlandı.

Soy-soplar, dostlar kel’di,
Baht ve quvanç tiledi.
Yıldızlar kokte yana,
Qısmet eserin yaza.
Musafirler eglene,
Kiyev oynay, sevine.
Onıñ qısmeti endi
Kelinniñ ellerinde.

Bağlama.

Nurlarnen tolar kun’ler,
Bugun’den başlap sizler
Nişanlılar degil’ de,
Apay, aqay olasız.

Çalsın, kemane çalsın,
Musafirler oynasın.
Guzel’ Qırım yurtunda
Daa çoq toylar olsun!

Bağlama