Туькезбан

Гьайиф тушни вун эцигиз чилерал,

Ширин вирт я, хуш нямет я, Туькезбан.

Хаму кард хьиз, хвена кIанда гъилерал,

Вун жагъайдаз хупI девлет я, Туькезбан

Вун жагъайдаз гьич ви къадир чизавач,

Зар-зибада гьамиша вун хуьзавач,

Бес за гьикIда? Вун рикIелай физавач,

Зав гвайди ви гъам-хифет я, Туькезбан.

Гимишдин пул дуьзмишна на яхада,

Ви ширин мез шад билбил хьиз рахада.

Агъузвалмир тай-туьшерин арада,

За ийирди ваз минет я, Туькезбан.

Гьар пакамахъ экъечIдай са рагъ я вун,

Гъилел кудай, нур гудай чирагъ я вун,

Гьар са ширин емиш авай багъ я вун,

Эминав гвайди ви дерт я, Туькезбан.