Мәхәббәт ялкыны

Онытам-онытам диеп, сине уйлап йөрим.
Килмә-килмә диеп, чакырам, чакырам.
Янган учакларга үзем сулар сибәм,
Үзем җылысына тартылам.

Килмә-килмә диеп, йөрәгемә бәйлим.
Сүндем-сүндем диеп, кабынам, кабынам.
Бармыйм-бармыйм диеп, сиңа таба чабам.
Сагынмыймын диеп, сагынам.

Бетте-бетте диеп, һаман уйлап йөрим.
Дәшмим-дәшмим диеп, сүз катам, сүз катам.
Исем китми диеп, көнләшүдән янам.
Күрә алмыйм диеп, яратам.