Тюеле (бара болурламы Кавказгъа)

Музыка и стихи Альберта Узденова

Ата Журтха элтген жолла кесилиб,
Онглуракъла чыкъдыкъ энтда бир жазгъа.
Тюе жыйын барад къумну тизилиб,
Ала бара болурламы Кавказгъа?

Башчы тюе кёллендиред жыйынын,
Тири атлайд ант этгенча талмазгъа.
Башчы болса, бир оноугъа сыйыныб,
Сюркелиб да жетер эдик Кавказгъа.

Кесинг онгсуз болсанг,кимге не айыб?!
Кюн таякъ да-къамчид мында онгсузгъа!
Тюеле уа кетгендиле ташайыб?!
Ала жете болурламы Кавказгъа?!

Жол азыгъы боллукъ эсек да жолда,
Кюрешейик башха журтда къалмазгъа.
Ёлмей жетсенг,насыб кёрген,ол анда
Ёлгенледен салам айтсын Кавказгъа!

Бу журтсузлукъ барад бизни тюб этиб,
Энтда саулай чыгъарбызмы биз жайгъа?
Ёлгенлени сыртыбызгъа жюк этиб,
Атланайыкъ,мадар табыб,Кавказгъа!

Ёлгенлени жюреклеге жюк этиб,
Атланайыкъ,мадар табыб,Кавказгъа!..