- СА КЪАМ - Къахетам дlабаьннаб, Эздел ахчах хийцад. Къаман юкъера Гlулакх, Б

- СА КЪАМ -

Къахетам дlабаьннаб,
Эздел ахчах хийцад.
Къаман юкъера Гlулакх, Безам
Ворхlий даьна дитад.
Къинойх дизза дола доллар
Вайнаьх уйлаш толхаяй.
Йицaяннай вайна Гаргало, Валар
Къаман Дикал йиц а яй.
Гlулакхе этта хийла адам
Бlаргашта гушшехь толхаш латта.
Къонах яхача деша маlан
Вай маlача наха дицдеш латта.
Мискача наьха хьакъа дуараш
Ди мел дола дебаш латта.
Хьарам Рузкъах коттабаьнараш
Шоай къемата ди дохкаш латта.
Массанена ховшдар дувца мича дезар
Бlаргашта гушдар харца-м дац,
Хьарам рузкъах кхебаь дезал
Иман долаш хила йиш яц.
Бокъо лорае оттабаьча наха,
Бокъон овла хоадабеш латта.
Шоай Сий дохкаш боацача маьха,
Кхааш ийдеш чlоагlалуш латта.
Хийла саг шийна пайда хьабаьлчахь,
Харцон тlехьа отташ ва.
Сагота вац ший Даьлах ваьлча,
Тlехьален Къинош lоадеш ба.
Латта вай мехка маьждегаш,
Дукха хоза лакхалуш,
Цхьаболча наьха Даьлах Тешам,
Ди мел дола лохалуш.
Ва са зlамига Эздий Къам!
Дала дезздаь кхелла Къам!
Беннаб вайна хоза мотт,
Дунен юкъера хоза Мохк!
Адамашта юкъера Гlулакх, Безам
Иман, Беркат, тlехьален дезал
Пайдан дий вай дикагlа даьхач,
Дикагla дийхач, гlишлош яр?!
Вай дай Гlулакхаш юкъера даьхач,
Пайдан дий тlехьа вай леладар?!
Мoгатардий Цу Везача Даьла
Вай харцоношта тlехьадалар?!
Ва са зlамига Къам! Хьасома дала!
Кхерам ба вайна Даьлах далар...