Белляу ( Омар Отаров )

Сени бетинге тёгюле тура
Джарыкъ нюрю толгъан айны.
Тауладан келген салкъын аязчыкъ
Чачынгы сабыр сылайды.

Кече салкъынды, тёгерек шошду,
Сен къайгъы этме бир джукъгъа.
Мен да сакълайма сени джукъунгу,
Джукъла, джаным, татлы джукъла.

Мен кёкде баргъан акъ булутланы
Санга келичи этерем,
Къуш къанатларым болсала сени,
Таулагъа алыб кетерем.

Мен алтын кюнню нюр таякъларын
Сени чачынга эшерем,
Чолпан джулдузну орнундан алыб,
Бойнунга мынчакъ этерем.

Тауладан келген таза хауаны
Сени солууунг сунама.
Аякъ ташлагъа атынгы джазыб,
Тансыкълаб, къараб турама.

Кече джарыкъды, тёгерек шошду,
Сен къайгъы этме бир джукъгъа.
Мен да сакълайма сени джукъунгу,
Джукъла, джаным, татлы джукъла.