Une jeune fillette

Une jeune fillette / De noble coeur, Plaisante et joliette / De grand' valeur,
Outre son gré, on l'a rendue nonette, / Cela point ne lui haicte, Dont vit en grand' douleur.

Un soir après complie / Seulette estoit, En grand mélancolie / Se tourmentoit,
Disant ainsi, douce vierge Marie / Abregez moy la vie, Puis que mourir je doy.

Mon pauvre cœur souspire / Incessamment, Aussi ma mort desire / Journellement.
Qu'à mes parens ne puis mander n'escrire, / Ma beauté fort empire, Je viz en grand tourment.

Que ne m'a t'on donnée / mon loyal amy, Qui tant m'a desirée / Aussi ay-je moy luy,
Toute la nuit m'y tiendroit embrassée / Me disant sa pensée, Et moy la mienne à luy.

Dieu vous dy mon père, / Ma mère et mes parens, Qui m'avez voulu faire / Nonnette en ce couvent,
Ou il n'y a point de réjouissance, / Je vis en desplaisance, Je n'attens que la mort.

La mort est fort cruelle / endurer, Combien qu'il faut par elle / Trestous passer.
Encor' est plus le grand mal que j'endure, / Et la peine plus dure Qu'il me faut supporter.

Dieu vous dy les filles / De mon pays, Puis qu'en c'est Abbaye / Me faut mourir,
En attendant de mon Dieu la sentence, / Je vy en esperance D'en avoir réconfort.