Музыка и стихи Альберта Узденова.

Музыка и стихи Альберта Узденова.

Бирле "Бойнакъ" болчу, делле,
Къуу сёзюнгю къойчу делле,
Харам хакъны аша, делле,
Кёрюнмейин джаша, делле.
Биз кюлмесек кюлме, делле,
Керексизге юрме, делле,
Сынджыргъа бой салчы, делле,
Бизден юлгю алчы, делле,
Былай болгъанд заман, делле,
Итге джетмейд адам, делле,
"Огъай!" - дедим, "хап-хап!" - делле,
"Гагайынгы терк джаб!" - делле.

Гагайымы джабалмадым,
Иги джашха саналмадым.
Исси-исси къабдырдыла,
Гагайымы да джабдырдыла".
Джюрек къалды биягъынлай,
Ит ауазла аны талай.

Заман - къобуз, отуз джылым,
Ол къобузда отуз къылым,
Сокъдум мен да билгенимча,
Кетмез ючюн келгенимча,
Алдамадым джамагъатны,
Тас этмезге адам атны.
Хамхот сюртген дженг болмадым,
Миллетимден кенг болмадым.

Адамла бла кёб танышдым,
Итле бла да кёб талашдым,
Талансам да бойсунмадым,
Бойнакъ атха турсунмадым.

Шукур, заман ишин этди,
Бойнакълагъа таякъ джетди.
Тохтамасын ма бу тюйюш!
Бу тюйюшге къоша юлюш,
Джангызлыкъдан баш алгъанма,
Джырла джырлаб башлагъанма...

Менге "Бойнакъ" болчу, дейле,
Къуу сёзюнгю къойчу дейле,
Харам хакъны аша, дейле,
Кёрюнмейин джаша, дейле.
Биз кюлмесек кюлме, дейле,
Керексизге юрме, дейле,
Былай болгъанд заман, дейле,
Итге джетмейд адам, дейле,
"Огъай!" - дедим, "хап-хап!" - дейле,
"Гагайынгы терк джаб!" - дейле.

Гагайымы джабалмайма,
Иги джашха саналмайма.