Утми торчы гомер

Үтми торчы гомер көт әле,
Бераз гына сабыр ит әле.
Яшьлек язларыннан,
Сөю назларыннан
Аерыласы килми бит әле.

Язгы ярсу елга шикелле
Ашыкмасаң була бит инде.
Күңелләрнең әле
Чәчәк аткан мәле,
Үтми торчы, гомер, көт инде.

Үтми торчы гомер көт инде,
Яз җилләре үпсен битемне.
Күңелләрнең әле
Назга тулган мәле,
Ә син инде җитте дисеңме?

Ә син инде җитте дисеңме?
Сезнең вакыт үтте дисеңме?
Алдыйсың ла, дустым,
Безнең яшьлек әле
Беркайчан да үтмәс шикелле.