Ийнарла ( Омар Отаров )

Къыз:
Къара агъачда къар барды,
Терк жюрюсенг жетерсе,
Эмен терек мен болуп
Жерге кирсенг не этерсе?

Жаш:
Эмен терек сен болуп,
Жерге кирген сен болсанг,
Жютю балта мен болуп ,
Кесип алсам не этерсе?

Къыз:
Жютю балта сен болуп,
Кесип алгъан сен болсанг,
Сабан темир мен болуп,
Жерге кирсем не этерсе?

Жаш:
Сабан темир сен болуп,
Жерге кирген сен болсанг,
Сегиз ёгюз мен болуп,
Тартып алсам не этерсе?

Къыз:
Сегиз ёгюз сен болуп,
Тартып алгъан сен болсанг,
Кёк кёгюрчюн мен болуп,
Учуп кетсем не этерсе?

Жаш:
Кёк кёгюрчюн сен болуп,
Учуп кетген сен болсанг,
Сары лячин мен болуп,
Къуууп тутсам не этерсе?

Къыз:
Сары лячин сен болуп,
Къуууп тутхан сен болсанг,
Тары бюртюк мен болуп,
Жайылышсам не этерсе?

Жаш:
Тары бюртюк сен болуп,
Жайылышхан сен болсанг,
Балалы тауукъ мен болуп,
Чёплеп алсам не этерсе?

Къыз:
Балалы тауукъ сен болуп,
Чёплеп алгъан сен болсанг,
Къыйын ауруу жабышып,
Ауруп жатсам не этерсе?

Жаш:
Къыйын ауруу жабышып,
Ауруп жатхан сен болсанг,
Бакъгъан устанг мен болуп,
Багъып турсам не этерсе?

Къыз:
Бакъгъан уста сен болуп,
Багъып тургъан сен болсанг,
Ол ауруудан къутулуп,
Къачып кетсем не этерсе?

Жаш:
Ол ауруудан къутулуп,
Къачып кетген сен болсанг:
"Менден къачма жанчыгъым" -
Деп, сюелсем не этерсе?

Кёб эришдик, даулашдыкъ
Энди аны къояйыкъ,
Сюйгенинге ийнандым,
Бир юйюрлю болайыкъ!